多謝滙豐，原來回憶都可以有第二個結局
有啲記憶唔係要忘記，而係終於有一日，可以笑住重新望返。
文 Ming | 2026 年 9月 22日。
一個夠膽玩「落水」嘅廣告
今次滙豐搵姜濤同馮德倫拍呢個「落水」廣告，我覺得真係好有膽量，而且個 idea 又幾正。
明星肯自嘲已經唔容易，一間跨國銀行夠膽陪一個超級巨星一齊自嘲，就更加難得。
姜濤一句「落水嚟講，我都算係 KOL 㗎喎」，馮德倫即刻接住一句「落得一次，又唔係自己爬返上岸，咁都叫 KOL 呀？」真係好香港、好抵死。
再加上「浸過鹹水」、「Your English is very good」呢啲位，將姜濤以前嘅「黑歷史」全部拎返出嚟玩，但又玩得好自然。
HSBC Hong Kong
最難得嘅，係姜濤自己都放得開
最重要係，姜濤自己完全放得開。
佢甚至可以笑住話，上次撈佢上嚟嗰張相唔夠靚，今次要「執一執個樣」。
一個藝人可以咁樣攞自己最狼狽嘅一幕出嚟自嘲，我覺得其實幾有勇氣。
而對我嚟講，呢個廣告嘅意義，比「好笑」更加深。
因為我曾經喺巴黎等佢
因為我係嗰班曾經喺巴黎等姜濤嘅粉絲之一。
2025 年 6 月 24 日，我本身係好期待佢嚟巴黎，期待見到佢去 Fashion Show。
嗰陣時諗嘅全部都係好開心嘅嘢：佢會著咩衫、會有咩造型、會唔會見到佢、會唔會有靚相、 會唔會攞到簽名、 佢有冇睇到我放係機場嘅易拉架呢。
點知突然收到嘅消息，唔係「姜濤準備出發去巴黎」，而係—— 「姜濤墮海。」
嗰一刻，我真係完全笑唔出。
嗰一刻，Fashion Show 已經唔重要
嗰陣時根本佢去唔去 Fashion Show唔再重要，我只係想知道佢有冇事。
原本係期待偶像嚟巴黎，最後變成不停等消息，希望佢平安。
嗰種驚，我到而家都記得。
所以，我永遠都唔會忘記佢到達巴黎機場嗰一刻。
「佢冇事就好。」
我記得佢落機個樣真係唔係幾掂。眼神閃避、不想被打擾、嚴肅既花姐全程守護住佢。
我見到佢嗰陣，第一個感覺已經唔係「終於見到姜濤」，而係—— 「佢冇事就好。」
嗰個畫面到而家仲留喺我腦入面。
我亦都唔會忘記佢離開巴黎、喺戴高樂機場望住我哋嗰個眼神。
嗰個眼神入面有一種好難形容嘅感覺，有感謝、有疲倦，亦有一種「多謝你哋一直喺度」嘅感覺。佢離開之後我忍唔住係機場爆喊、 好狼狽。
可能佢自己未必知道，但對我嚟講，我真係一直記住。
原來「落水」都可以變成一個笑話
每當我諗起姜濤墮海呢件事，我每次都想喊。
我一諗起「落水」，第一個感覺係驚。
但而家，我竟然可以笑住睇佢著住救生衣，再一次落水，仲可以聽住佢同馮德倫互相抽水。
我覺得，呢個先係真正嘅「放低」。
HSBC Hong Kong
放低，唔代表忘記
唔係話嗰件事冇發生過，亦唔係叫自己唔好再記得。
而係有一日，你終於可以重新望住嗰段記憶，而嗰段記憶唔再只剩低恐懼。
姜濤自己已經可以笑住面對，而我哋呢班曾經好驚嘅粉絲，好似亦終於可以陪佢一齊笑。
多謝滙豐，畀我一個新嘅結局
所以我真係想多謝滙豐。
你哋可能只係想拍一條有創意、有話題性嘅銀行廣告，但對我嚟講，呢條廣告好似幫我將一段一直唔敢太用力去回想嘅記憶，重新寫咗一個結局。
以前，我最想見到嘅係姜濤喺巴黎嘅 Fashion Show。
嗰一次，我等到嘅卻係一場意外。
而家，我再一次睇住佢「落水」，但今次我冇驚。
因為我知道，你會上返岸
因為我知道，佢會自己上返岸。
而且係笑住、靚靚仔仔咁上岸。
有時候我諗返嗰日，仲係會眼濕濕。
我會記得佢抵達巴黎嗰陣個樣，亦會記得佢離開戴高樂機場嗰陣望住我哋嘅眼神。
但而家，我終於可以喺眼淚入面加返一點笑。
因為我知道，嗰件事真係已經過咗。
終於，可以笑住睇你上岸
多謝姜濤，令我哋終於可以笑住面對「落水」呢兩個字。
亦多謝滙豐，令我終於可以笑住睇你上岸。
Ming
留言