從 9 歲到 13 歲的堅持：學生糖 Adrian 與姜濤「用作品說話」的成長約定
- Ming CHU
- 2月1日
- 讀畢需時 3 分鐘
文 Ming | 2026 年 2 月 1 日
專訪：13歲學生糖 Adrian 的追星心路歷程
Ming ： Adrian，你好！今日好高興可以同你傾偈。不如先同大家介紹一下你自己，同埋你係點樣開始「入坑」鍾意姜濤㗎呢？
Adrian： 我係 Adrian，今年 13 歲。其實我係受到媽媽影響，之後就開始鍾意姜濤。我大概九歲就開始鍾意佢，嗰陣時我最鍾意《蒙著嘴說愛你》呢首歌，同埋佢主演嘅電視劇《超感應學園》，我覺得嗰陣時嘅阿姜真係好得意。
credit : keungshowhkfc Youtube
Ming ： 原來你 9 歲就開始支持佢！咁除咗覺得佢得意之外，你覺得係咩原因令你咁深愛姜濤，甚至支持咗咁多年？
Adrian： 你可能會問我係乜嘢原因令我咁鍾意姜濤。我會答你：因為我好鍾意佢嘅音樂同埋佢嘅反差，佢每一首嘅歌都帶著唔同嘅意思。
Ming ： 講到作品嘅意思，有無邊首歌嘅歌詞係令你特別有共鳴？
Adrian： 例如《黑月》，講緊「一體兩面，如何持續正念」。你可能會問我點解我會揀呢句歌詞，因為我覺得每個人都有兩面，善與惡。就好似阿姜喺今次演唱會講嘅「姜濤A」同「姜濤B」咁，我自己都經歷過。
例如我之前有個朋友，我成日同佢玩，有時仲會請佢食嘢；但當我冇請佢食嘢嘅時候，佢就冇再同我玩，仲會暗中怪我（暗中話我），所以我覺得呢句歌詞好有意思。另外我都好欣賞阿姜會「用作品說話」，講出佢嘅心路歷程。
Ming ： 聽得出你對阿姜嘅作品睇得好透。由 12 歲開始，你開始參與實體活動，有無邊次經歷係最難忘？
Adrian： 我 12 歲開始就會出一啲 event 同睇 show，每一次我都覺得好開心，因為可以同一班喜愛姜濤嘅姜糖一齊支持我哋深愛嘅人，話畀姜濤聽我哋一直都喺度 ❤️。
我第一次見到姜濤真人就係 NBA 傳奇明星賽，嗰次係非常難忘嘅一次！之後我亦都去過 NBA Atelier Event、Chill Genki 記者會，同埋今年我最鍾意嘅 show —— 《Keung To Lava live 2025》。最後當然仲有一年一度最緊要嘅「叱吒」。
Ming ： 講到叱吒，你今年都有去現場投票支持佢？
Adrian： 係呀，好開心可以去到叱吒支持阿姜同投佢一票。因為阿姜一直帶咗好多好嘅作品畀我哋，咁我哋就應該要喺呢個時候去回報返佢。
仲有呀，我之前喺香港站跳過《On a Sunny Day》Challenge。當時現場充滿住人，但我都仍然堅持去做我想做嘅嘢。最後我順利完成咗個 Challenge，仲畀阿姜「點燈」添！😭🥹
Ming ： 嘩！俾偶像點燈真係好幸運。但係作為中學生，同學之間難免會有唔同聲音，佢哋會唔會笑你鍾意姜濤㗎？
Adrian： 會㗎。但係我反而會同佢哋更加推廣，令佢哋認識呢個人，我亦會介紹佢嘅音樂畀佢哋聽。例如我有幾個同學都好鍾意《流浪星球》，希望佢哋都可以透過音樂更加了解佢。
Ming ： 最後，聽講你同其他學生糖正喺度籌備緊「430 應援計劃」，可以分享下詳情嗎？
Adrian： 係呀！我哋今次 430 應援計劃係由我同兩位學生糖喺銅鑼灣一間餐廳舉行。我哋會佈置嗰間餐廳，包括有油畫、枱墊、人型紙牌等等嘅應援。大家可以留意我哋 IG ：
@iankeung_
@adriantse125
@keunggg._xffe
希望大家可以多多支持！今次集資大家可以喺我哋三個學生糖嘅「430 集資 thread post」留言位置撳條 Link 填 Form。我哋今次嘅應援物係用我哋自己影嘅相整嘅。如果今次有剩餘嘅錢，我哋會整更多嘅應援畀大家！
在 Adrian 身上，我們看見了新一代「姜糖」的堅韌與創意。年僅 13 歲的他，不僅能深刻解讀《黑月》中的正念，更能將追星的熱情轉化為實際的統籌能力。由他發起的 430 餐廳應援計劃，展示了學生群體如何透過集資與合作，為偶像送上最純粹的祝福。
雖然追隨偶像的路上偶有雜音，但 Adrian 的堅定告訴我們：只要心中有熱愛，就無懼任何目光。這場 430 的約定，不僅是 Adrian 對姜濤的感謝，更是他用勇氣與堅持寫下的一篇青春誌。
留言