我如何重新聽懂廣東歌
- Ming CHU
- 7天前
- 讀畢需時 3 分鐘
2026年 3月27日
文| Ming
身處海外嘅我，住喺一個冇乜香港人嘅地方（布魯塞爾）。但由細到大，我成長時一直都聽廣東歌。可能係因為掛住香港，又或者係當時因為適應唔到新環境。語言不通，聽到廣東話，反而俾到我一種安全感。
細個移民之後，我變得沉默寡言，好似一隻小動物咁，靜靜觀察住身邊嘅新環境。係廣東歌一路陪伴我長大，而我最鍾意嘅歌手係關淑怡，因為佢嘅歌聲好感性，好容易觸動人心。
長大後踏入社會，生活忙碌，有一段時間冇再聽廣東歌 返過幾次香港， 對於我嚟講係一個最熟悉的陌生城市。直到我認識咗姜濤。佢有啲作品真係好特別——特別在於，如果我只係隨便聽，會完全唔明首歌想表達乜。我明晒每一個字，但就係捉唔到個訊息。點解會咁？以前嘅歌，多數都係談情說愛，好直接。
但當我用心去了解、甚至翻譯之後，就會愈嚟愈鍾意佢嘅作品，覺得好有趣、好有意思。我係由《蒙著咀說愛你》開始認識佢——因為我個混血囝囝超級鍾意呢首歌，雖然佢除咗 “I love you” 之外，基本上完全聽唔明 😂。
真正開始鍾意佢，應該係《Masterclass》嗰段時間。當時姜濤被張敬軒邀請做演唱會嘉賓，我見到佢好受歡迎。《斷點》唱得好溫柔動人，但到《Masterclass》嗰段 “nanananana”，再加上佢擺頭嘅動作，唱到「年輕怎麼就是錯 誰不解釋就恨我」——真係好有型。雖然我已經唔年輕，但內心其實都有一種隱藏嘅反叛 。
住喺外國，好少有機會見到姜濤現場演出。直到《Keung To Lava 2025》喺香港，我一口氣睇咗四場演唱會，真係深深被佢嘅表演感動。
佢嘅聲音辨識度好高，音色獨特又有感染力，舞蹈亦非常能表達歌曲意思。佢唔單止係「唱」歌，而係將作品由心演繹出嚟——好似喺現場「重新活一次」首歌，用身體語言、視覺同聽覺去傳達訊息。
以下幾首作品係最好嘅例子：
《孤獨病》——好多粉絲都好鍾意，但我一直都冇被MV或者錄音版感動。直到平安夜嗰晚，我見到佢喺華麗嘅升降台上，我只望到他背影孤獨咁演繹呢首歌。當佢唱錯一句歌詞：「難道怨下去 人間真的會喜歡我」，嗰一下，深深刺入我內心——原本以為已經癒合嘅傷口，再次被觸動。
《鏡中鏡》——佢同其中一個代表佢心魔嘅舞蹈員拼搏後走進無限延伸嘅鏡子之中，睇到佢嘅背影我真切感受到佢嘅孤獨同無助。
《寂寞圓舞》——一開始我完全唔明首歌講乜因為當時我未有時間去深究。舞台上見到一個身穿白色衣服嘅舞者不斷繞圈，姜濤穿著黑色舞服，應該是代表著天使和魔鬼，兩個人糾纏掙扎最後融合成一體、互相依靠。「3.14159」呢組數字引起咗我注意、當時未聯想到是圓周率pi的意思。我甚至去翻譯法文歌詞，了解背後訊息之後，徹底愛上呢首歌同佢嘅演繹。舞台點樣呈現個概念，令整件事變得非常完整。
所以，姜濤嘅歌唔係淨係「聽」，而係要「睇」，而且最好係現場睇。不過要小心——睇過一次，你好可能會愛上，會產生共鳴，然後開始研究佢嘅作品、訪問，想了解更多佢呢個人，甚至佢嘅 “Keung Philosophy”。
由關淑怡到姜濤，其實某程度上係兩種唔同時代嘅「情感語言」。關淑怡嗰種感性，好直接，旋律加聲線已經可以承載情緒——唔需要解碼，都可以直接感受到。
但姜濤代表住另一種創作邏輯：佢唔係「講一個情緒」，而係「建構一個狀態」。
以前好多廣東歌（特別係90年代）偏向敘事型：愛、分手、掛念。而姜濤嘅作品好多時係碎片式、象徵式。
例如《寂寞圓舞》入面提到嘅 3.14159（π）：
呢啲元素唔係用嚟「直接理解」，而係用嚟「感受同聯想」。佢創造一個空間，俾人投射自己，而唔係提供一個標準答案。大家由「聽眾」變成「參與者」。
姜濤嘅作品有少少似現代藝術：
第一次接觸：未必明白
第二次（理解背景）：開始有感覺
第三次（結合自身經歷）：變成屬於佢自己嘅故事。
或許每個人都會喺某個時刻，透過一把聲音重新認識自己。對我而言，呢段旅程由廣東歌開始，再由姜濤延續。當你願意放低成見，用心去聽、去睇、去感受，你會發現，音樂唔單止係旋律同歌詞，而係一種能夠跨越語言、時間同距離嘅連結。希望有一日，你都會喺佢嘅作品之中，搵到屬於自己嘅共鳴。
Ming
留言